tá-káu hái-íng，ji̍t-thâu iánn DEMO 16

▎期待能再次在烈日下漫遊。〈tá-káu hái-íng，ji̍t-thâu iánn／打狗海湧，日頭影）

詞：ông huē bûn
曲：n̂g tí ka
bass：黃翼帆
drums：滕
guitar：葉來發

西仔灣聽候海湧的歌（華：在西子灣等待海浪的歌聲）
－se-á-uân thìng-hāu hái-íng ê kua
欶燒酒螺相對看（華：吸著燒酒螺，看著對方）
－suh sio-tsiú-lê sio-tuì-khuànn

踏生鉎生鉎的輪仔（華：踏著些許生鏽的單車）
－ta̍h senn-sian senn-sian ê lián-á
走揣：竹林、海賊、旗後山（華：找尋：竹林、海盜、旗後山）
－tsáu-tshuē：tik-nâ、hái-tsha̍t、kî-āu-suann

渡船頭，退火食冰角（華：渡船頭，吃冰塊降火氣）
－tōo-tsûn-thâu，thè-hué tsia̍h ping-kak
旗津、鎖卷仔、鰇魚跤（華：旗津、小捲、魷魚鬚）
－kî-tin、 sió-kńg-á、liû-hî-kha

踏生鉎生鉎的輪仔（華：踏著些許生鏽的單車）
－ta̍h senn-sian senn-sian ê lián-á
搜揣：港都、打狗、高雄港（華：搜尋：港都、打狗、高雄港）
－tshiau-tshuē：káng-too、tá-káu、ko-hiông-káng

日頭，佇遮，佇遮，敢有影？（華：太陽，在這裡，在這裡，有影子嗎？）
－ji̍t-thâu，tī tsia，tī tsia，kám ū iánn ？
大船，入港，入港，敢有聲？（華：大船，進港，進港，有聲音嗎？）
－tuā-tsûn，ji̍p káng，ji̍p káng，kám ū siann？

踏生鉎生鉎的輪仔（華：踏著些許生鏽的單車）
－ta̍h senn-sian senn-sian ê lián-á
偷啖高雄港海水鹹鹹（華：偷嘗高雄港鹹鹹的海水）
－thau tam ko-hiông-káng hái-tsuí kiâm-kiâm
偷聽愛河河水恬恬（華：偷聽安靜無聲的愛河）
－thau thiann ài-hô hô-tsuí tiām-tiām

踏生鉎生鉎的輪仔（華：踏著些許生鏽的單車）
－ta̍h senn-sian senn-sian ê lián-á
泅--入，大路的窗仔門（華：游入大馬路的窗戶）
－siû--ji̍p，tuā-lōo ê thang-á-mn̂g
軁--入，海邊的大山跤（華：鑽進海邊的山腳下）
－nǹg--ji̍p，hái-pinn ê tuā-suann-kha

你敢...？你敢閣捌--我？（華：你...你還認得我嗎？）
－lí kám...？lí kám koh bat--guá？
阮攏是坐你搖笱大的打狗囝（華：我們都是坐你搖籃長大的打狗孩子）
－guán lóng-sī tsē lí iô-kô tuā ê tá-káu-kiánn

毋管台北、美國、西班牙（華：不管台北、美國、西班牙）
－m̄-kuán tâi-pak、bí-kok、se-pan-gâ
思念．．．（想念．．．）
－su-liām．．．
海湧的聲（華：海浪的聲音）
－hái-íng ê siann
日頭的影（華：太陽的影子）
－ji̍t-thâu ê iánn

柴山
tshâ-suann
猴山仔，佇遐，佇遐
kâu-san-á tī hia tī hia

旗津
kî-tin
三輪車，起行，起行
sann lián tshia khí-kiânn khí-kiânn

古早馬卡道佇平埔行踏
kóo-tsá Makatao tī pênn-poo kiânn-ta̍h
現代打狗兄
hiān-tāi tá-káu-hiann
飛上雲頂城
pue-tsiūnn hûn-tíng siânn
練唱港都戀愛歌青春夢
liān-tshiùnn káng-too luân-ài tshing-tshun-bāng