08_清明活動
lennontoolbar
合作音樂人
- 藍濃道具屋
介紹
雖然咱所知影的清明節是四月四號或者是五號，毋過佇臺灣有一寡人會把握過年團圓的時間，出門培墓。也因此這个一年一改，慎終追遠的活動，對開春的時，就佇臺灣四界攏開始囉。
清明節毋是干焦培墓爾爾，佇數念祖先的同時，嘛會當佮罕得見面的親情五十，同齊出門行行咧，和祖先來一場野餐。
培墓
佇親人往生三冬到五冬，囝孫會準備較豐沛的祭品，祭拜先祖，閣會修整添塗，提供先人良好的居蹛環境。往過好額人會準備較濟祭品，分送予附近較散赤的人家，這款的行為延伸成做後來的乞墓粿。
踏草青
古早有上巳節，嘛叫做三日節，是早年社會唯一的連續假期。周朝的時會佇這一工佇溪裡洗浴，共不祥洗清氣，這就是修禊。漢朝的時，甚至變做節日，每一冬的這个時陣，逐家會做伙歡喜啉酒，郊遊聯誼佮談戀愛。
乞墓粿
早前因為物資較缺，真濟囡仔會鬥看牛。閣因為墓地平常時仔罕咧有人行跤到，雜草叢生，所以就變做放牛的牧草地。有當時仔牛會利用墓牌抓癢佮磨角，毋過可能會損蕩墓牌。
為著欲減少這款情形，好額人會佇培墓的時分墓粿，除了希望牧童會當手下留情，鬥看顧墓地，嘛會當照顧附近的散赤囡仔。為著感謝提供墓粿的善人，遮的囡仔甚至家己編真濟好話，比如講『墓粿賰賰，予你囝孫做將軍』。
但是乞墓粿毋是攏遮爾仔平和，有一寡較狡怪的囡仔會講『墓粿若無來，牽牛共你鑢墓牌』，會當講是臺灣的『不給糖就搗蛋』。
寒食
佇漢文化內底，三千年前，每一冬四月彼跤兜就有禁火的風俗，尾仔演變做寒食節。紲落來到宋朝，寒食節所留落來的干焦賰飲食習慣，逐家會佇清明節，準備一寡點心，親像逐家上熟似的潤餅佮草仔粿。
潤餅
潤餅是用熟的薄麵皮?菜蔬佮豆乾，閣會摻塗豆麩佮芫荽的點心。內底?的食材會因為家庭佮意啥物、地區出產啥物來變化，食起來有層次，芳閣甜。
草粿
春天，田野百草叢生，古早人會採集芳氣較厚的植物濫入粿皮，包餡炊熟，是紮咧方便閣好保存的米食。
歌詞
這是沒有提供歌詞的歌曲