翕

Prod:
　周穆 a.k.a. Murky Ghost
　Boycany a.k.a. 簡岳虹

Mixing:
　Boycany a.k.a. 簡岳虹

Cover Art:
　Jet0127

《翕 Hip》

台北今夜冷清清（註 1）
Tâi-pak kin iā líng tshin tshin
剩青紅燈佇閃爍
tshun tshenn-âng-ting tī siám-sih
心情淡薄也稀微
sim-tsîng tām-po̍h iā hi-bî
無半個人影通好翕
bô puànn ê lâng-iánn thang hó hip

想起彼工甲你約束
siūnn-khí hit-kang kah li iok-sok
若是閣相拄欲替你翕相片
nā-sī koh sio-tú beh thè li hip siòng-phìnn
想起你捌甲阮講
siūnn-khí li bat kah gún kóng
你愛的人早攏無佇
li ài ê lâng tsá lóng bô-tī

這陣你人置佗位
tsit-tsūn li lâng tì tó-ui
甘有所在通予你去
kam ū sóo-tsāi thang hōo li khi
抑是坐佇房間捘電視
ia̍h-sī tsē tī pâng-king tsūn tiān-sī
反正入夢著會當團圓
huán-tsìng ji̍p bāng tio̍h ē tàng thuân-înn

這陣你人置佗位
tsit-tsūn li lâng tì tó-ui
甘有約會通好無閒
kam ū iok huē thang hó bô-în
抑是倒佇眠床耍手機
ia̍h-sī tó ti bîn-tshn̂g sńg tshiú ki
點著往事一支閣一支
tiám to̍h óng-sū tsi̍t ki koh tsi̍t ki

我可能有病
guá khó-lîng ū pēnn
幾百種人格
kuí pah tsióng lîn-keh
肖想閣分裂
siàu-siũ koh hun-lia̍t

我嘛毋知影這陣
guá mā m̄ tsai-iánn tsit-tsūn
到底是佗一個
tàu-té sī tó tsi̍t ê
參誰佇講話
tsham siáng ti kóng-uē

翕著你的目睭
hip tio̍h li ê ba̍k-tsiu
翕著你的身軀
hip tio̍h li ê sing-khu
翕著你的無奈
hip tio̍h li ê bô-nāi
翕著你的鬱卒
hip tio̍h li ê ut-tsut
相閃身的人真濟
sio-siám-sin ê lāng tsin tsē
只有生份人講心內話
tsí-ū tshinn-hūn-lâng kóng sim-lāi-uē

翕著你的頭鬃
hip tio̍h li ê thâu-tsang
翕著你的芳味
hip tio̍h li ê phang-bī
翕著你的歡喜
hip tio̍h li ê huann-hí
翕著你的傷悲
hip tio̍h li ê siong-pi
相閃身的人真濟
sio-siám-sin ê lāng tsin tsē
無常永遠閃袂過
bû-siông íng-uán siám bē kuè

過去心不可得（註 2）
kuè-khì sim put-khó tit
現在心不可得
hiān-tsāi sim put-khó tit
未來心不可得
bī-lâi sim put-khó tit
患得患失
huān tit huān sit
嘛無路用
mā bô lōo-īng

過去心不可得
kuè-khì sim put-khó tit
現在心不可得
hiān-tsāi sim put-khó tit
未來心不可得
bī-lâi sim put-khó tit
一句關心
tsi̍t kù kuan-sim
講袂出喙
kóng bē tshut tshuì

・
註
1 《台北今夜冷清清》1986 黃建銘 詞 收錄於 洪榮宏台語專輯7未了情
2 《金剛經》鳩摩羅什 譯本