台江兩百冬 feat.曾伯豪

《台江兩百冬》

作曲：阿雞GLOJ
作詞：阿雞GLOJ
（副歌參考：王受祿老師「台江十六寮」）

-------------------------------

音樂製作 Song Credit：

演唱Performer | 阿雞GLOJ、曾伯豪
製作人Producer | 劉子齊
編曲Arrangement | 劉子齊
二胡Erhu | 曾伯豪
錄音 Recording Engineers | 程鉦文
錄音室 Studio | 三川娛樂 南方錄音室
混音工程師Mixing Engineer | 劉子齊

拜咧請
鹿耳門的媽祖娘娘帶阮遊台江
了解台江不止虱目魚肉閣有油蔥香
期待四草大眾廟的鎮海元帥 處理好勢
不止保庇這片台江閣有序大佮序小
鹽田北寮鎮安宮早期漲水災有夠魯
這馬安置南寮佮永鎮宮相照顧
學甲寮的菅埔地 學甲移居莊大姓
溪南寮綁紅腳巾 囝仔獅傳薪火
紲落來 來到公塭仔的萬安宮
舊曆正月初九70人的蜈蚣陣
什二佃的南天宮 東邊特色拜神榕
西邊就是福德祠 守護聖地聖天池
金獅陣 黃腳巾之一 本淵寮
廟口夜市熱鬧予你攏袂肚子餓
敢無看到海尾斧 嘛愛聽到海尾鼓
我甲你講歡迎大廟興學 海尾朝皇宮

土城仔聖母廟 鹿耳門天后宮
四草的大眾廟 鹽田里鎮安宮
南鹽田永鎮宮 學甲寮慈興宮
溪南寮興安宮 公塭仔萬安宮
什二佃南天宮 本淵寮朝興宮
海尾寮朝皇宮 什三佃慶興宮
外塭。和濟宮 新和順保和宮
公親寮清水寺 佗是你的信仰

副歌
安身立命起草寮 台江出名十六寮
兩百冬來無比較 團結二十七庄頭

安南區人心內攏有一尊保生大帝
心內的話透過躑筊懇求信仰解決任何問題
首先溪頂寮保安宮找故事
新宅新安宮咧整修 舊和順出名鼓花陣庇佑
新和順 南路寮 陳卿寮
保生大帝鬥相共每冬輪流三庄頭
陳卿寮人真骨力 擔蔥賣菜綁掃把
草湖寮 叫王蕊連寮代天宮拜李府
什三佃 展現百年學堂文化
起佇二樓興安宮總頭寮施一半
百年魚木布袋嘴 代天府埕闊闊闊
溪心寮人口加加加 外塭跳宋江
中洲寮保生大帝面對面啊
五塊寮榕樹七星陣 新寮金獅陣黃腳巾
指定 公親寮 清水祖師做公親啊
團結你我的夢 台江建庄200冬

溪頂寮保安宮 新宅的新安宮
和順寮慈安宮 五塊寮慶和宮
中洲寮保安宮 南路寮保鎮宮
陳卿寮保山宮 草湖寮代天宮
總頭寮興安宮 新寮的鎮安宮
布袋嘴代天府 溪心寮保安宮
求豐收求願望 求平安求健康
望台江人民 一直驕傲
守護台江 充滿力量
這就是你的信仰 佇你的心中

副歌
安身立命起草寮 台江出名十六寮
兩百冬來無比較 團結二十七庄頭

Out
守護 黑面抐桮的厝 生存需要互相
守護 曾文溪的溪流 公道佇你心中
守護 你我的海翁堀 尊重你的信仰
守護 兩百年的歷史 逐家攏是英雄