囡仔 (HEY KID)

囡仔（HEY KID）
張睿銓 / 阿弟仔

囡仔，你著愛會記
歷史教咱錯誤會當原諒但是袂當袂記
越頭轉來了解你對佗位來
才有法度知影欲對佗位去
囡仔，你著愛會記
歷史有講別人的意見有時陣會予你受氣
互相了解互相尊重鬥陣才會出頭
壓霸剝削有一工就換你無底覕

一九四五年一陣人來到這个番薯島
怹講台灣是偉大中國的一省
轉來祖國，阮國民黨會疼惜照顧
無兩年人民的期待變做塗塗塗
乞食兵路邊放尿放屎無衛生
囂俳搶婚搶劫刣人放火白食白啉
陳儀政府佔田佔地貪污專賣
你若無水準才會來講台灣話
一九四七年二月二七怹的警察
用銃敲一个賣菸歐巴桑的頭
開銃砰死一个徛佇邊仔的少年仔
人民擋袂牢，來去抗議、來去大稻埕
中國兵狼毒提銃掃射
用鉛線殘忍穿過一排人的手佮跤
縛予絚，一个一个銃決
兩萬人的性命兩禮拜了絕

囡仔，你著愛會記
歷史教咱錯誤會當原諒但是袂當袂記
越頭轉來了解你對佗位來
才有法度知影欲對佗位去
囡仔，你著愛會記
歷史有講別人的意見有時陣會予你受氣
互相了解互相尊重鬥陣才會出頭
壓霸剝削有一工就換你無底覕

紲來戒嚴三十八年白色恐怖
管你外省本省客家福佬抑是原住民
黨看你袂爽，你著馬上無去
林義雄老母兩个查某囝全部刣死
雷震批評蔣介石hông關十年
殷海光寫冊hông監視逼死
蔣經國全面禁止台語節目
連布袋戲歌仔戲嘛愛講北京話
勇敢的台灣人拍拚追求民主自由
政治改革的美麗島、農民抗爭的五二○
關的關死的死，鄭南榕為言論自由
點起來彼支火猶未燒了
囡仔，你著愛會記
怹的流血流汗艱苦犧牲予你自由的空氣
毋通袂記，民主革命才開始
無經過寒冬的風雪，看袂著春天的花蕊

囡仔，你著愛會記
歷史教咱錯誤會當原諒但是袂當袂記
越頭轉來了解你對佗位來
才有法度知影欲對佗位去
囡仔，你著愛會記
歷史有講別人的意見有時陣會予你受氣
互相了解互相尊重鬥陣才會出頭
壓霸剝削有一工就換你無底覕

我祝福你會當好勢，我祈求你會曉分別
我希望你會使改變以後的社會
我祝福你會當好勢，我祈求你會曉分別
我希望你會使改變不義的一切

加一个勇健的台灣囡仔
台灣就加一塊摃袂破的活氣磚角
所以逐工愛運動，啉八大杯燃過的水
莫食菸毒，啉茶莫啉咖啡
一禮拜愛看一本冊，智識就是力量
認捌愈濟，家己做主的信心愈強
學校上課愛專心，聽無著愛問先生
認真寫功課，嘛無需要補習
趁錢有通食、有通穿、有通買冊
聽音樂、放假去山頂海邊行行就好
莫貪心，閣欲買股票佮名牌手錶
提摩太六章十節：貪財是萬惡之根
莫像遐个術仔去中國唱歌演戲
捲舌捲捲舌，閣規工開喙內地內地
國民黨的千億黨產，誰刣死尹清楓
囡仔囡仔，你著愛會記

囡仔，你著愛會記
歷史教咱錯誤會當原諒但是袂當袂記
越頭轉來了解你對佗位來
才有法度知影欲對佗位去
囡仔，你著愛會記
歷史有講別人的意見有時陣會予你受氣
互相了解互相尊重鬥陣才會出頭
壓霸剝削有一工就換你無底覕

（以上台語漢字歌詞由李江却台語文教基金會和呂美親協助修訂。感恩！）

---------------------------------------------------------------------------
This is the first rap (and might be the first musical composition, to my limited knowledge) ever that explicitly depicts the February 28 Massacre of 1947 in Taiwan, launched by Chiang Kai-shek and his Chinese Kuomintang (KMT, also known as the Chinese Nationalist Party), and the thirty-eight-year martial-law era that followed the Massacre. More than twenty thousand people disappeared or were slaughtered in the Massacre, countless more in the martial-law era, as is typical of extreme political persecution and witch hunts (generally referred to as "White Terror" in Taiwan). The song is a tribute to all those brave souls—both Formosans and newcomers—who died fighting the KMT and its dictatorial government, which was finally ended by Taiwan's fledgling democracy in 2000. 我們不會忘記陳文成博士命案。