11. 仇富不仁
MastaMic
歌詞
11. 仇富不仁
Verse 1:
住喺香港 講我有嘢想講
我每日都上網 網上自由講
網上 係窮人唯一可以講嘢嘅地方
平時我講到口乾 都無人聽我講
因為香港 窮人永遠幫有錢人開荒
窮人永遠係有錢人嘅金礦
有錢人咁忙 忙住搶窮人嘅家當
佢哋咬住我唔放 直至將我榨乾
有人話 仇富係嚟自純粹妒忌心
妒忌啲有錢人 因為妒忌人哋有錢搵
妒忌亦慢慢蠶食人心
妒忌亦慢慢變成仇恨
我想問 旣然有錢人搵嘅錢係取之於民
有幾個會本住企業良心 關心民生
我再問 田生
你而家義正嚴詞 批評政府嘅扶貧措施
咁點解當時 你唔支持 立法訂立最低工資
又有幾間大公司對此表示過大力支持
喺商家眼中
最緊要可以縮減開支
最緊要係提高盈利數字
最緊要係公司可以集資上巿
窮人嘅事 事不關己 話之你死 你死你事
所以 根本 窮人憎嘅唔係有錢人
窮人最憎嘅係為富不仁嘅賤人
Verse 2:
喺香港生活似遊戲 唔係個個啱玩
唔啱窮人玩 窮人負責畀人玩
你睇下啲地產豪宅起完一間接一間
我做到隻狗 只夠供一塊地板
為一個私人空間 走去死慳爛慳
正常一日三餐我慳到一日一餐
返工由朝早我踩夠兩更 踩到半夜三更
廿年後啱啱夠首期 供發水樓一間
爭銀行嘅錢仲爭三十年要還
啲利息多到夠我買多一間
點解香港人要有間屋都咁艱難
點解成世人都系咁畀地產玩殘
又話人人平等
又唔見你哋啲錢 係人人平分
你哋所謂經濟平穩 就係財富分配不均
可以控制錢銀嘅永遠係一小撮人
功能組別嘅功能 就係財團嘅護身
官商勾結 一早係舊聞
剝削小巿民 窮人叫天不應 叫地不聞
窮人好聽叫做基層 窮到就嚟變饑民
有錢人 如果你仲未明 點解會畀人怨恨
我請你撫心自問 問一問你嘅良心
我上述講嘅種種惡行 你有無份