一個人跳舞 / Dance Alone

一個人怕孤獨，兩個人怕辜負
以前喜歡一個人，現在喜歡一個人

所以
我
一個人跳舞

詞 Lyricist | 茜茜LadyQ
曲 Composer | 茜茜LadyQ
編曲 Arrangement | 茜茜LadyQ
主唱 Vocal | 茜茜LadyQ
吉他 Guitar | 高國緯
鼓 Drum | 游政邦

其實咱兩人 || kî-si̍t lán nn̄g-lâng
一開始就無對著點 || tsi̍t-khai-sí tō bô tuì tio̍h tiám
陪我的時間 || puê guá ê sî-kan
敢真正予你遮毋願 || kám tsin-tsiànn hōo lí tsiah m̄-guān

是我一廂情願 || sī guá tsi̍t-siunn-tsîng-guān
是我對你空思戀 || sī guá tuì lí khang su-luân
是我愛你無彩工 || sī guá ài lí bô-tshái-kang
孤單跳舞我一人 || koo-tuann thiàu-bú guá tsi̍t-lâng

無你的永遠 || bô lí ê íng-uán
按怎跳嘛攏仝款 || án-nuá thiàu mā lóng kāng-khuán
跳舞一个人 || thiàu-bú tsi̍t-ê-lâng
其實嘛無遮悽慘 || kî-si̍t mā bô tsiah tshinn-tshám

是我一廂情願 || sī guá tsi̍t-siunn-tsîng-guān
是我對你空思戀 || sī guá tuì lí khang su-luân
是我愛你無彩工 || sī guá ài lí bô-tshái-kang
孤單跳舞我一人 || koo-tuann thiàu-bú guá tsi̍t-lâng

一个人跳舞 || tsi̍t-ê-lâng thiàu-bú
袂心煩 || bē sim huân
目睭嘛袂 || ba̍k-tsiu mā bē
哭甲紅紅紅 || khàu kah a̋ng-âng-âng
將時間當做音樂 || tsiong sî-kan tòng-tsuè im-ga̍k
慢慢放 || bān-bān pàng
煞鼓時 || suah-kóo sî
心頭較輕鬆 || sim-thâu khah khin-sang

一个人跳舞 || tsi̍t-ê-lâng thiàu-bú
像做夢 || tshiūnn tsuè-bāng
已無你抱我 || í bô lí phō guá
抱甲絚絚絚 || phō kah a̋n-ân-ân
我跤步 || guá kha-pōo
袂再踏甲遮爾亂 || bē tsài ta̍h kah tsiah-nī luān
孤單跳舞我一人 || koo-tuann thiàu-bú guá tsi̍t-lâng
---

一步閣一步 || tsi̍t-pōo koh tsi̍t-pōo
一步閣一步 || tsi̍t-pōo koh tsi̍t-pōo
慢慢跳離開你的跤步 || bān-bān thiàu lī-khui lí ê kha-pōo
今後袂再悲傷 || kim-āu bē-tsài pi-siong
跳出我家己的跤步 || thiàu tshut guá ka-tī ê kha-pōo

思念囥心內 || su-liām khǹg sim-lāi
無想你知 || bô siūnn lí tsai
愛你的心情 || ài lí ê sim-tsîng
慢慢放大海 || bān-bān pàng tuā-hái
搖搖擺擺 || iô-iô-pái-pái
對我的愛 || tuì guá ê ài
你袂再傷害 || lí bē-tsài siong-hāi

華爾滋 || ua-lú-tsuh
應該愈精彩 || ing-kai jú tsing-tshái
跳赤赤 || thiàu tshiah-tshiah
應該嘛袂䆀 || ing-kai mā bē-bái
新歌無想 || sin-kua bô siūnn
跳甲太凊彩 || thiàu kah thài tshìn-tshái
換歡喜的未來 || uānn huann-hí ê bī-lâi