學習民謠三部曲之一｜《學習民謠三部曲》－張錦桂

01
Tsia sī puàn-kah-tsí í-tsîng ê tāi-tsì
遮是半甲子以前 ê 代誌
Tsiàn sī tshoo-tshiu ē/e-poo sî
正是初秋下晡時
Guā lâi lâng-kheh tsē lo̍h í
外來人客坐落椅
Tsiong Bîng-khun lāu-su i tsiàn sī
鍾明昆老師伊正是
02
Lāu-su tsē lo̍ h kóng lâi ì
老師坐落講來意
Ǹg-bāng tsng-tiong tshiùn khik tsiá
向望庄中唱曲者
Gîm-tshiùn hiàng-sî ê kua-si
吟唱向時 ê 歌詩
Ji̍p tsng tshái-lo̍ k tsoh tsíng-lí
入庄採錄作整理
03
Tsiong-kīn sit-lo̍ h ê kì-tî
將近失落 ê 記持
Tsíng-lí thuân-sîng kin-kì
整理傳承有根據
Tsng-lāi gâu tshiùn tsoh sian khì
庄內𠢕唱作仙去
Tshuē lâi Tsiong Tê、Huan-pô、Siù-lân î
揣來鍾茶、番婆、秀蘭姨
04
San lâng lûn tshiùn Su-siang-ki
三人輪唱思想起
Gû-bó-phuān tshiùn kah tsiok ū bī
牛母伴唱甲足有味
Hit-mê tshái-lo̍k tsin sūn-sī
彼暝採錄真順序
Lāu-su thian kah tsiok huan-hí
老師聽甲足歡喜
05
Beh tńg hit sî ū piáu-sī
欲轉彼時有表示
Tsng-tiong kū-tiāu ū tshiùn khí
庄中舊調有唱起
Tshiat-kì it-tīng liân-lo̍k i
切記一定聯絡伊
Pó-hōo bûn-huà bē thîng-tsí
保護文化袂停止
06
Tshái-lo̍k khik-sû tsiok kan-khóo
採錄曲詞足艱苦
Tâi-lâm Buán-tsiu hn̄g lōo-tôo
台南滿州遠路途
Tsi̍t-pōo tsi̍t-ìn bô uì khóo
一步一印無畏苦
Tì-tsiá hîng-sū ū kuân-tōo
智者行事有懸度
07
Kiân-ji̍p phian-tshuan se̍h Puàn-tó
行入偏村踅半島
Bû tsīn hōng-hiàn bô thîng pōo
無盡奉獻無停步
Bû-hîng tsu-sán tsuân ji̍p phóo
無形資產全入譜
Tsuân uī ka-hiong lâu pó-khòo
全為家鄉留寶庫
08
Tshái sû lo̍k khik tsi̍t tuān-lo̍h
採詞錄曲一段落
Thui-kóng bîn-iâu tē it pho
推廣民謠第一波
Tshit tshuan liân-ha̍p tsò-hué o̍h
七村聯合做伙學
Siōng hn̄g Káng-á siū o-ló
上遠港仔受呵咾
09
Peh-tsa̍p-gōo nî tsiap thong-ti
八十五年接通知
Bîn-iâu kàu-ha̍ k tsiàn khai-sí
民謠教學正開始
Kò-kò siā-khu tsò tiû-pī
個個社區做籌備
Tō-su kok tsng lûn-liû khì
導師各庄輪流去
10
Buán-tsiu siōng hn̄g Káng-á-tshuan
滿州上遠港仔村
Suan-lōo hn̄g tôo iū koh uan
山路遠途又閣彎
Beh lâi thui-tōng tshuē lâng o̍h
欲來推動揣人學
Siā-khu ha̍k-guân tsò tsham-khó
社區學員做參考
11
Mê-sî ūn-tōng ūn-lu̍t hó
暝時運動韻律好
Kóo-tiāu tshiùn lâi sim sng tso
古調唱來心酸慒
Ha̍k-guân tsham-khó bô hia̍ p-hô
學員參考無協和
Ta̍k-ke tsi̍t-huan tsoh su-khó
逐家一番作思考
12
Lāu-su tsuan-tîng kài-siāu bûn-huà pó
老師專程介紹文化寶
Lán ê bîn-iâu sè-kài bô
咱 ê 民謠世界無
Tsiân-jîn lâu lo̍h ê tsì-pó
前人留落 ê 至寶
Kî-thāi ta̍k-ke jīn-tsin o̍h
期待逐家認真學
13
Bûn-huà tsiau-pâi hōo lín khò
文化招牌予恁靠
Khik-sû ti̍k-sû lâng o-ló
曲詞特殊人呵咾
Im-tiāu tsua̍ t-tuì pa̍t-uī bô
音調絕對別位無
Tong-hā ha̍k-si̍p mài tshò kò
當下學習莫錯過
14
Kàu-siū kài-siāu tio̍h sî-ki
教授介紹著時機
Ha̍k-guân thian liáu lóng tông-ì
學員聽了攏同意
Tsik-sî tsuân-pan lâi o̍h khí
即時全班來學起
Gōo-khang sió-tiāu Su-siang-ki
五孔小調思想起
15
Kà-tshiùn kóo-tiāu tsiok huan-hí
教唱古調足歡喜
Kàu-siū sūn-sè lâi thê-khí
教授順勢來提起
Lín thiàu thóo-hong-bú sī tsiām-sî
恁跳土風舞是暫時
Án-tsuán thê lâi bîn-iâu pí
按怎提來民謠比
16
Kàu-siū sim hí guān-li̍k khai
教授心喜願力開
Guān-bāng sing kóng hōo lín tsai
願望先講予恁知
Bûn-huà iân-sio̍ k tsiok kî-thāi
文化延續足期待
Tha-ji̍t tuà lín iû sè-kài
他日帶恁遊世界
17
Kàu-siū tuā guān tsiàn thián-khai
教授大願正展開
Ha̍k-guân thian liáu tshiò-hai-hai
學員聽了笑咍咍
O̍h ē bîn-iâu iû sè-kài
學會民謠遊世界
Guán thian tshiūn bāng bô si̍t-tsāi
阮聽像夢無實在
18
Kóo-lē hó-uē guán lóng tsai
鼓勵好話阮攏知
Thian kóng im-ga̍ k bô kok-kài
聽講音樂無國界
Kàu-siū thê-tshén koh kau-tāi
教授提醒閣交代
O̍ h hó thuân-sîng tsiap bī-lâi
學好傳承接未來