✿✿｜阿嬤講故事乎恁聽｜✿✿ －《滿州民謠總舵手 - 鍾明昆教授》（下半部）

｜阿嬤講故事乎恁聽｜《滿州民謠總舵手 - 鍾明昆教授》收錄40首張碧英老師記寫鍾明昆教授一生傳之詩詞，以滿州民謠傳統曲調演繹。
－
屏東縣滿州鄉民謠協進會｜製作
製作人｜黃彥儒
平面攝影｜連偲妘
製作助理｜蔡孟庭

✿✿｜阿嬤講故事乎恁聽｜✿✿
《滿州民謠總舵手 - 鍾明昆教授》

23 [思想起]
後來暫蹛叔父兜，娘親放心省苦惱，
三頓生活家己包，假日轉來款糧草。

24 [思想起]
天生精巧 ê 頭殼，加添後天 ê 苦讀，
無受家庭來束縛，順利放心去求學。

25 [思想起]
教授認真又拍拚，成績優秀真出名，
自立自強歹命囝，命運操磨攏毋驚。

26
娘親扞家擔頭重，公費錄取較輕鬆，
出業就有飯碗捀，頭路固定才穩當。

27
考牢師範真光榮，光宗耀祖答恩情，
親朋戚友好風評，將來一定有前程。

28 [楓港小調]
畢業服務無幾年，決心上進 ê 心理，
進入臺灣師大去，深造音樂心願圓。

29 [楓港小調]
願望目標來達成，牽教學生盡才能。
為人師表好風評，教導有方人尊敬。

30
做人忠厚閣和氣，佮人相處講情義，
良緣王氏情投機，才子佳人結連理。

31
娘親歡喜笑微微，早前勞苦變甘甜，
囝孫和樂享晚年，家庭美滿閣四序。

32 [平埔調]
為著傳承滿州聲，歇假走傱故鄉行，
走揣長輩 ê 音影，毋驚勞苦暝日拚。

33 [平埔調]
一生奉獻在故鄉，民謠揣根上為重，
待人謙虛又體諒，犧牲付出難形容。

34
教授鄉里種福田，歌詞創作數萬千，
歌謠逐首攏經典，萬古流傳大貢獻。

35
教授用心閣拍拚，今日才有民謠聲，
保存有聲兼有影，留予後代學佮聽。

36 [五孔小調]
慈祥鼓勵笑微微，牽教指導真和氣，
處事圓滿得人意，耐心精神無人比。

37 [五孔小調]
暝日勞苦有功果，滿州民謠掛名號，
才華出眾人呵咾，感謝栽培佮指導。

38 [牛母伴]
傳來仙命不幸去，予阮傷心目屎滴，
民謠佗位問透機，親像大樹斷了枝。

39 [牛母伴]
這世恩情阮永記，民謠資產傳千年，
功德無量蔭囝兒，造福鄉里是天意。

40 [牛母伴]
今日告別永分離，長官親友來相辭，
神佛護靈引上天，向望夢中來指示。