✿✿｜阿嬤講故事乎恁聽｜✿✿ －《滿州民謠總舵手 - 鍾明昆教授》（上半部）

｜阿嬤講故事乎恁聽｜《滿州民謠總舵手 - 鍾明昆教授》收錄40首張碧英老師記寫鍾明昆教授一生傳之詩詞，以滿州民謠傳統曲調演繹。
－
屏東縣滿州鄉民謠協進會｜製作
製作人｜黃彥儒
平面攝影｜連偲妘
製作助理｜蔡孟庭

✿✿｜阿嬤講故事乎恁聽｜✿✿
《滿州民謠總舵手 - 鍾明昆教授》

[開篇詞]
滿州民謠揣根基，鍾教授明昆先生；
為欲傳承暝日拚，犧牲精神勝性命；
一生奉獻為滿州聲，欲知伊 ê 故事綴阮行。

01
早前滿州真偏僻，交通不便較散赤，
為著生活來拍拚，拄著困難攏毋驚。

02
農村生活真艱苦，佳哉爹親有生理路，
經營木材火炭庫，貨換貨 ê 交換所。

03 [思想起]
一家生活有倚靠，三頓食穿免煩惱，
有人疼惜佮照顧，家庭美滿天相助。

04 [思想起]
一家人口較纓纏，五位阿兄二大姊，
兄弟姊妹真和氣，家庭和樂無地比。

05 [平埔調]
天有不測 ê 風雲，人有禍福 ê 時陣，
無疑風雲變命運，一切情景袂平順。

06 [平埔調]
爹親為家暝日拚，望欲囝兒好養晟，
勞苦過度受病疼，疏忽身體 ê 勇健。

07
命運改變拄開始，爹親不幸西方去，
當時教授幼年時，爸囝永遠拆分離。

08
娘親一時目屎滴，可憐細漢小孩兒，
天真活潑斯當時，命運滾笑來創治。

09 [五孔小調]
加添大戰空襲時，兄哥被調南洋去，
娘親傷心兼怨氣，命運坎坷無人比。

10 [五孔小調]
娘親聰明有智慧，身兼慈母嚴父位，
堅強精神真可貴，賢慧女德好行為。

11
早前檳榔上值錢，娘親精通做生理，
為欲防止賊偷去，母囝上山來徛起。

12
山寮暗時較稀微，鳥隻叫聲含悲意，
半暝動物挵門邊，這種苦情到何時？

13 [牛母伴]
驚惶過度難入眠，第一可憐𪜶娘親，
暝日勞苦無人伨，母囝相楗真感人。

14 [牛母伴]
娘親心酸唱歌詩，歌曲時常掛喙邊，
那做那唱目屎滴，教授聽著暗傷悲。

15 [楓港老調]
歌曲聽久條條記，才情飽學人明理，
精光猛醒受教示，鼓舞上進添志氣。

16 [楓港老調]
一心想欲有樂器，家境不准照心意，
自想創作來開智，就地取材真順利。
17
材料取來做地基，專心研究來做起，
無師自通靠家己，聰明伶俐無人比。

18
人生創作第一步，產品完成無幼路，
總是有成較贏無，日後研究再改造。

19 [四季春]
產品完成蓋歡喜，面帶笑容笑微微，
這是命運 ê 轉機，增加信心佮勇氣。

20 [四季春]
心願終尾來實現，一生上愛殼仔絃，
奏出音樂人欣羨，辛苦代價有體面。

21
受著娘親 ê 影響，教授求學有方向，
文化保存為家鄉，保存古調上為重。

22
求學時代誠艱苦，恆春初中第一所，
當時無車用行路，透早出門著半晡。