萬事美妙

行過世界千千 kiânn kè sè-kài tshian tshian
紛紛擾擾 攏無重要 hun-hun-liáu-liáu, lóng bô tiōng-iàu
思想美妙 萬毒不侵 su-sióng bí-miāu, bān to̍k put tshim

2024 年司公鈃仔花的第三張專輯《萬事美妙》已經攢好勢矣，這擺欲帶來幾若條無仝款又閣特別的台語歌曲，精彩內容絕對予你想袂到。
《萬事美妙》內面每一塊歌曲攏用無仝的角色落去設想，替這个主角表達想法，見面頭一條有講古仙代先做介紹，然後仙人予你啟示佮祝福，閣來是生份人無奈的心聲，斡一个斡去拄著一位有智慧的人，伊提醒一陣人愛較精光咧，毋通像七月半鴨仔，「毋知死活」。紲落來是對著社會事件大聲嚷，發覺著現實嘛是譀譀。佇咧巷仔口拄著相命仙共咱問話，予咱加正濟自信，後來閣去拄著一對熱戀的愛人。這馬鏡頭換來到細漢的時，學校內底的塑膠品仔樂隊，予咱雄雄去思念著過往的序大人，目屎拭拭下，讀一篇少年政治犯的自白書。落尾，路邊一位表演的藝人用伊的歌聲來鼓勵咱重新出發。規張專輯袂輸是綴司公鈃仔花四界看，有時批評、有時趣味，留出真濟空間予聽眾家己感受、家己思考。

2024 nî Sai-kong-giang-á-hue ê tē-sann tiunn tsuan-tsi̍p ‘Bān-sū-bí-miāu’ í-king tshuân hó-sè--ah, tsit-pái beh tuà-lâi kuí-lō tiâu bô kāng-khuán iū-koh ti̍k-pia̍t ê tâi-gú kua-khik, tsing-tshái luē-iông tsua̍t-tuì hōo-lí siūnn bē kàu.
‘Bān-sū-bí-miāu’ lāi-bīn muí tsi̍t tè kua-khik lóng iōng bô-kāng ê kak-sik lo̍h khì siat-sióng, thè tsit-ê tsú-kak piáu-ta̍t siūnn-huat, kìnn-bīn thâu tsi̍t tiâu ū kóng-kóo sian tāi-sing tsuè kài-siāu, liân-āu sian-jîn hōo-lí khé-sī kah tsiok-hok, koh lâi sī tshinn-hūn-lâng bô-nāi ê sim-siann, uat tsi̍t-ê uat khì tú-tio̍h tsi̍t uī ū tì-huī ê lâng, i thê-tshínn tsi̍t tīn lâng ài khah tsing-kong--eh, m̄-thang tshiūnn tshit-ge̍h-puànn ah-á, ‘m̄ tsai sí-ua̍h’. Suà--lo̍h-lâi sī tuì tio̍h siā-huē sū-kiānn tuā-siann lióng, huat-kak tio̍h hiān-si̍t mā sī hàm-hàm. Tī-leh hāng-á-kháu tú-tio̍h siòng-miā-sian kā lán mn̄g-uē, hōo lán ke tsiànn tsē tsū-sìn, āu--lâi koh khì tú-tio̍h tsi̍t tuì lia̍t-luân ê ài-lîn. Tsit-má kiànn-thâu uānn lâi kàu suè-hàn ê sî, ha̍k-hāu lāi-tué ê sok-ka phín-á ga̍k-tuī, hōo lán hiông-hiông khì su-liām tio̍h kuè-óng ê sī-tuā-lâng, ba̍k-sái tshit tshit--ē, tha̍k tsi̍t phinn siàu-liân tsìng-tī huān ê tsū-pi̍k su. Lo̍h-bé, lōo-pinn tsi̍t uī piáu-ián ê gē-lîn iōng i ê kua-siann lâi kóo-lē lán tiông-sin tshut-huat. Kui-tiunn tsuan-tsi̍p bē-su sī tè Sai-kong-giang-á-hue sì-kè khuànn, ū-sî phue-phîng, ū-sî tshù-bī, lâu tshut tsin tsuē khong-kan hōo thiann-tsiòng ka-kī kám-siū, ka-kī su-khó.