民生路口

大學上尾的坎站—畢業
咱用這條歌來記錄學校內、附近佮阮生活的記持，共上媠的點點滴滴留落來

樹頂的斑芝花
Tshiū-tíng ê pan-tsi-hue
開滿四年的留戀
Khui muá sì-nî ê liû-luân
路邊的野草
Lōo-pinn ê iá-tsháu
共幼茈褪掉
Kā iù-tsínn thǹg-tiāu
畢業典禮的相片
Pit-gia̍p tián-lé ê siòng-phìnn
有人歡喜有人哭
Ū-lâng huann-hí ū-lâng khàu
時間一直流
Sî-kan it-ti̍t lâu
流到選擇的車頭
Lâu kàu suán-ti̍k ê tshia-thâu

越頭看 每一个熟似的形影
Ua̍t-thâu khuànn muí tsi̍t ê si̍k-sāi ê hîng-iánn
心內的鹹汫
Sim-lāi ê kiâm-tsiánn
生活可能袂閣交插
Sing-ua̍h khó-lîng buē koh kau-tshap

再會啦 peh 袂起來的透早
Tsài-huē--lah peh buē khí-lâi ê thàu-tsá
買 Lu-lu-mi 的卵餅
Bé Lu-lu-mi ê nn̄g-piánn
再會啦 美樂蒂唱的歌
Tsài-huē--lah Mé-lo̍k-tì tshiùnn ê kua
唱甲逐家攏梢聲
Tshiùnn kah ta̍k-ke lóng sau-siann
天光到暗暝 五花十色的日子
Thinn-kng kàu àm-mî ngóo-hue-tsa̍p-sik ê ji̍t-tsí
寫袂完大學生活的酸甘甜
Siá bē uân tāi-ha̍k sing-ua̍h ê sng-kam-tinn
再會啦 離開只是暫時
Tsài-huē--lah lî-khui tsí-sī tsiām-sî

樹頂的斑芝花
Tshiū-tíng ê pan-tsi-hue
開滿四年的清芳
Khui muá sì-nî ê tshing-phang
褪殼的蟬仔
Thǹg-khak ê siân-á
已經誠做大人
Í-king tsiânn-tsò tuā-lâng
過去四冬的相片
Kuè-khì sì-tang ê siòng-phìnn
是記持起的大樓
Sī kì-tî khí ê tuā-lâu
時間一直流
Sî-kan it-ti̍t lâu
流到離別的十字路口
Lâu kàu lī-pia̍t ê si̍p-jī-lōo-kháu

越頭看 每一个熟似的形影
Ua̍t-thâu khuànn muí tsi̍t-ê si̍k-sāi ê hîng-iánn
心內的鹹汫
Sim-lāi ê kiâm-tsiánn
生活可能袂閣交插
Sing-ua̍h khó-lîng buē koh kau-tshap

再會啦 鬥陣拍拚的學寮
Tsài-huē--lah tàu-tīn phah-piànn ê ha̍k-liâu
考試報告攏 all pha
Khó-tshì pò-kò lóng all pha
再會啦恁仔細 ko ni chi wa
Tsài-huē--lah an zii se ko ni chi wa
台檢 B2 無咧驚
Tâi-kiám B2 bô leh kiann
聲調漢字閣有羅馬字
Siann-tiāu hàn-jī koh ū lô-má-jī
寫袂完大學生活的酸甘甜
Siá bē uân tāi-ha̍k sing-ua̍h ê sng-kam-tinn
再會啦 離開只是暫時
Tsài-huē--lah lî-khui tsí-sī tsiām-sî

有一工咱會閣再相逢
Ū tsi̍t-kang lán ē koh tsài siong-hông