無代誌 行出去
陳珍儀
合作音樂人
- 羅士哲
介紹
佇我工課場上艱苦的彼段時間，捌去參加台南風中燈牽亡歌陣舉辦的營隊。當我聽著林宗範老師唱「幽冥菩薩」這首歌的時陣，我規个人予這首歌的曲調迷- -去。原本這个旋律是來自車鼓陣的水車，林宗範老師用中板的速度來演唱，旋律有淡薄仔悲傷，一直重複的曲調嘛親像某一種經文仝款，予人得著一寡安慰佮陪伴。林老師講牽亡歌有一種功能是咧安搭在生的人，予我想起某一段足鬱卒的時期會聽心經的歌。彼个時陣，我就想講欲用「幽冥菩薩」這首牽亡歌的旋律材料來創作一首歌，用來安搭佇工課場強欲接載袂牢的自己。
因為這个創作毋是咧安慰亡魂，完全是咧講我個人的代誌佮感受，閣想欲用一種自我剾洗的方式來展現，所以我共原本的曲調規个顛倒反，而且予伊成做一首輕快的歌曲。
...查看更多 收合歌詞
女：眼那前唉唷萬境由心造
男：我聽你這个仙姑來開示
女：心緒若是紛紛唉唷自咧花啊膏咧
男：自花膏啊 伊啊嗨唷伊啊伊
女：想行入我的夢境求一寡平靜
男：夢中你敢有收著指示
女：原地來行踏 我煞愈來愈無啊明咧
男：愈無明咧 伊啊嗨唷伊啊伊
女：啊～無想欲閣繼續逐工吐大氣
目屎含佇腹內嘛講無代誌
無代誌，行出去，我真古錐
世界真趣味 伊～
男：雜草之中有花蕊，烏雲深處是天星
若是緣淺無交集，切莫觸纏費心神
女：天阿清彼个月明我全領受
男：天清月明好𨑨迌
女：風雨來交加我也共思啊量咧
男：也思量咧 伊啊嗨唷伊啊伊
女：總啊是彼个自然無好䆀啊
男：雨落傷久嘛擋袂牢
女：對飲彼个烏雲我嘛是會當暫啊且留咧
男：暫且留咧 伊啊嗨唷伊啊伊
女：啊～無想欲閣繼續逐工吐大氣
目屎含佇腹內嘛講無代誌
無代誌，行出去，我真古錐
世界真趣味 伊～呀
男：雜草之中有花蕊，烏雲深處是天星
若是緣淺無交集，切莫觸纏費心神
合：啊～無想欲閣繼續逐工吐大氣
（雜草之中有花蕊）
目屎含佇腹內嘛講無代誌
（烏雲深處是天星）
無代誌，行出去，我真古錐
（若是緣淺無交集，切莫觸纏費心神）
伊～