無水寮
陳珍儀
介紹
無水寮是高雄大樹區一个舊庄頭，傳說清國時代，無水寮庄因爲佮屏東萬丹地區仝款較倚清國政府，所以和周圍的庄頭(九曲堂庄等)袂合，不時會有庄頭拚的代誌發生，紀錄中上悲慘的一改死傷有千外人。人數較少的無水寮庄為欲保持佇巷仔內戰鬥的優勢，庄內的路攏狹狹仔閣彎彎曲曲，閣佇庄頭廟廟埕操練宋江陣。歷史上的恩恩怨怨，致使兩庄甚至袂當相嫁娶。毋過，現此時，我佮翁婿毅冠拄好一个是無水寮人，一个是九曲堂人。我暗想敢有可能百年前有一對情人因為庄頭恩怨袂當做伙，若按呢，阮兩人的結合毋就圓滿了過去的遺憾。這首「無水寮」因為歌詞風格以及伊的歷史背景，所以用歌仔戲的風格來創作。
...查看更多 收合歌詞
大樹頂綠葉少，孤鳥像木雕
酸冷風來攪擾，有岫難逍遙
毋敢吼 毋敢吼，心內吹洞簫
只好來懇求月娘，光明照阮兜
落崎後現蹊蹺，哀鳴過溪溝
飛生驚揣出口，路小閣彎曲
踅袂到踅袂到，冤魂吹蠟條
怎會烏雲閘月，斷翅捀酒甌
血色土地上愛苗焦涸涸
毋敢向望開花的無水寮
等待百外年的批當時送到
情人百年了後想袂到
遠遠聽見兩人的笑
玫瑰花芳味四界飄搖
樹項孤鳥思念美容嬌
輕聲祝福唱歌在水寮
血色土地上愛苗來變竅
會當向望開花的無水寮，
等待百外年的批今送到
情人拆開了後想袂到
遠遠聽見兩人的笑
玫瑰花芳味四界飄搖
樹項孤鳥迎來美容嬌
輕聲鬥陣唱歌在水寮
啊牽手做伙在水寮