鳥仔岫
陳珍儀
介紹
我看過一段影片，內底記錄原住民中年婦女看著家己的厝予怪手拆除的時，那流目屎，那用族語唱悲傷的歌謠。拉瓦克部落是高雄唯一的平地原住民部落，予市府認定是違建，族人認定市府拆厝處分違法提告工務局，最後高雄高等行政法院認定，高市府強拆違法，應該撤銷的拆除處分。雖然市政府無閣上訴，毋閣因為驚惶不得已離開部落的人，除了愛面對接受安置的過程中種種的困難，部落的集體記持佮文化特殊性嘛佇都市發展的聲音中失落去矣。
拉瓦克部落內底嘛有蹛一寡漢人，已經融入部落佮逐家成做一个支持系統。我用臺灣民謠「一隻鳥仔吼啾啾」的旋律來發展。雖然時空背景無仝，失去家園的原因嘛無仝，毋過這款不得已愛離開家園的心情，毋管佗一个族群，攏是會足毋甘，以及毋願。
備註：此事經過欲十年了後有新的發展，2023年1月高雄市政府啟動安置機制，經過一年超過33遍以上與部落溝通，落尾達成「異地安置、自力興建」的共識。
...查看更多 收合歌詞
樹林內 上乾瘦的一欉樹
樹枝頂 上舒適的鳥仔岫
對美夢伸出冰冷的一隻手
捒倒樹 月光恬恬送溫柔
嘿嘿 嘿都一隻鳥仔飛出岫
飛去覕佇生疏的別欉樹
嘿嘿 嘿都一隻鳥仔硬屈守
搜揣破岫阿沓沓仔收
樹林內 上乾瘦的一欉樹
樹枝頂 上舒適的鳥仔岫 唉呦喂
對美夢伸出冰冷的一隻手
捒倒樹 月光恬恬送溫柔
嘿嘿 嘿都一隻鳥仔飛出岫
飛去覕佇生疏的別欉樹
嘿嘿 嘿都一隻鳥仔硬屈守
搜揣破岫阿沓沓仔收
嘿嘿 嘿都一隻鳥仔哮啾啾
翅落毛啊飛袂遠
對月光傾訴的歌聲 啊 都內
句句聲悠悠