曲痀
陳珍儀
介紹
《曲痀》這首歌佮農業人口的流失有關係。背景是佇一擺友善耕作的討論會上，一个長期陪伴佮觀察農村發展的在地人所講的一段話。「逐家攏定定講庄跤的序大用殺草劑真害。毋過，我嘛欲幫in講一寡話。農村少年愈來愈少，就算贏過冠軍米的水田地，嘛只賰老人序大佇咧堅持，看著庄內愈來愈濟人共田地賣予都市人來種別莊。毋願放棄家己土地的序大，身軀愈來愈無力，干焦會當用除草劑共伊鬥相共，伊嘛知影對家己身體和土地無好，毋過，這已經是伊唯一想會著，會當共土地留落來的方式。」
《曲痀》這首歌是用臺灣民謠牛犁仔歌來發展的。牛犁歌嘛叫做「牛犁陣」佮「駛犁陣」，是較早農村真四常的民俗活動。牛犁歌詞曲的流變有足濟講法，其中，簡上仁認為：「臺南縣的西拉雅族，每年攏有一擺追思祖靈、祈求生活平安順利的夜祭儀式。大內鄉頭社村的平埔族，通常佇農曆十月十五日舉行夜祭祖先神阿立祖的活動。彼工暗時，男女老幼佇 公廨集合，以牽曲的方式唱十首祭歌來表示對祖先神的禮敬。十首祭歌內底，第一首的旋律動機，佮牛犁歌的旋律誠相𫝛。」
...查看更多 收合歌詞
日頭落佇水田底 ，滿天野草伴伊飛
到底佗位是天抑閣佗位是地，曲痀坐佇田岸邊
揹著曲痀的記持，酸冷的田水笑問伊
到底是咧堅持啥物，到底是咧堅持啥物
肩胛頭擔袂起的是生份的時代
除草劑除掉的是一世的光彩
曲痀的眼神只有看對水田內 那哎喲e
才會當揣著熟似的天，佮祖先的目屎
日頭落佇水田底，滿天野草伴伊飛
到底佗位是天抑閣佗位是地，曲痀坐佇田岸邊
揹著曲痀的記持，酸冷的田水笑問伊
到底是咧堅持啥物，到底是咧堅持啥物
那哎喲啊伊都堅持啥物
那哎喲啊伊都笑問伊
肩胛頭擔袂起的是生份的時代
除草劑除掉的是一世的光彩
曲痀的眼神只有看對水田內 那哎喲e
才會當揣著熟似的天，佮祖先的目屎