時間的月台邊
陳珍儀
介紹
《時間的月台邊》 這首歌是咧講照顧失智序大的家屬的心情。作家夏夏2020年出版的「傍晚五點十五分」這本册內底，幼路呈現作為失智者家屬以及照顧者的心情。2022年的春天，朋友向我提起一个真有歲的製琴師傅，精神佮認知已經小可仔各樣，雖然挨絃仔的時猶原看會出伊專業的光彩，毋過伊的身影佮所講的話煞透露真大的寂寞，予朋友感覺心酸酸。過一站仔，我聽著朋友提老師傅整修的琴挨「百家春」，心內開始有創作這首歌的想法。失智者的記持一點一點落去的時，厝裡的人和朋友總是會恬恬仔抾起來，偷偷仔囥佇家己的心內。
「百家春」會使講是北管音樂內底，大眾上捷聽著的弦譜樂曲，較早捌有高閑至前輩演唱的版本流傳。《時間的月台邊》就是佇百家春頭前段旋律的架構頂面來發展，最後借用百家春演唱版本上高潮的樂句做結束。
...查看更多 收合歌詞
少年的日誌紙飛來相疊，時鐘的長短針行毋著跤
佇記持的迷宮內，彼疊日誌紙你抽著佗一頁
是行路有風的好時機，是走若飛的少年時
抑是細漢的時，細漢𨑨迌的路邊
（口白：日誌紙又閣飛起， 你已經坐佇五點十五彼班車頂面）
我笑笑講無要緊
反正你的年紀坐車已經毋免錢
隨在你欲去佗位
（口白：去看較早蹛過的公司，去看猶未關門的電影院，去你上愛去的菜市，去一直想欲去的Ha-oa-ih，呵～ 你講公司的守衛仔用雞腿咧飼貓咪，戲院的門票只要五箍銀）
你唸講果子雄雄變遮貴
講Ha-oa-ih嘛熱佮欲死
親愛的你真愛四界去，不時上車無咧相辭
我嘛笑笑講無要緊
你回程車票就毋好phàng見
略略仔嘛愛轉來歇一時
因為我佇時間的月台邊
等你