范謝你來了｜府城大二爺 Hú-siâⁿ Tōa-jī-iâ Eldest Lord & Second Lord of the Prefectural City

詞：羅士哲 Lô Sū-thiat
曲：臺灣民間曲調 Taiwanese Folk Melody

守護城池正有聖 Siú-hōo siânn-tî tsiànn ū siànn
城隍威靈鎮府城 Sîng-hông (ê) ui-lîng tìn Hú-siânn
善心來拜心會定 Siān-sim lâi pài sim ē tiānn
若有做歹會驚惶 Nā ū tsò pháinn ē kiann-hiânn

府城城隍威靈公 Hú-siânn Sîng-hông Ui-lîng-kong
賞善罰惡展神通 Siúnn-siān-hua̍t-ok tián sîn-thong
奸邪燒香無路用 Kan-siâ sio-hiunn bô-lōo-iōng
正直不拜又何妨 Tsìng-ti̍t put pài iū hô-hông

世人好歹三不等 Sè-lâng hó-pháinn sam-put-tíng
算盤揲落（去）才分明 Sǹg-puânn tia̍k-lueh tsiah hun-bîng
二四司爺傳號令 Jī-sì su-iâ thuân hō-līng,
文武判官做駕前 Bûn-bú-phuàn-kuan (lâi) tsò kà-tsîng

甘柳板棓手來攑 Kam Liú pán-pue tshiú lâi gia̍h
後壁（綴）一對大二爺 āu-piah (tuè) tsi̍t tuì Tuā-jī-iâ
四將展威除妖邪 Sù tsiòng tián ui tû iau-siâ
欲來守護咱府城 Beh lâi siú-hōo lán Hú-siânn

謝范將軍做巡查 Tsiā Huān tsiong-kun tsò sûn-tsa
一懸一低烏白衫 Tsi̍t kuân tsi̍t kē oo pe̍h sann
在世為非想奸詐 Tsāi-sè uî hui siūnn kan-tsà
枷索加身無精差 Kê-só ka sin bô tsing-tsha

二爺做前探路草 Jī-iâ tsò tsîng thàm lōo-tsháu
跤手猛掠展拳頭 Kha-tshiú mé-lia̍h tián kûn-thâu
大爺隨後連鞭到 Tuā-iâ suî-āu liâm-mi kàu
歹心毒行伊總剿 Pháinn-sim to̍k-hîng i tsóng tsâu

火籤魚枷攑懸懸 Hué-tshiam hî-kê gia̍h kuân-kuân
魍魎惡鬼無地旋 Mǹg-sǹg ok-kuí bô tè suan
烏白兩將仝心願 Oo pe̍h nn̄g tsiòng kâng sim-guān
勸人毋通做不端 Khǹg lâng m̄-thong tsuè put-tuan

甘願勞苦做差使 Kam-guān lô-khóo tsò tshe-sài
賞善罰惡合應該 Siúnn-siān-hua̍t-ok ha̍p ing-kai
跤步盡踏陰陽界 Kha-pōo tsīn ta̍h im-iông-kài
解勸世人做好代 Kái khuàn sè-lâng tsò hó tāi